La Poesía

EL EMBARGO

Señol jues, pasi usté más alanti
                      y que entrin tos ésos.
                     No le dé a usté ansia,
                     no le dé a usté mieo...
Si venís antiayel a afligila,
sos tumbo a la puerta. ¡Pero ya s´ha muerto!
Embargal, embargal los avíos
                     que aquí no hay dinero:
                      lo he gastao en comías pa ella
y en boticas que no le sirvieron;
                      y eso que me quea
porque no me dio tiempo a vendello,
                     ya me está sobrando,
                     ya me está jediendo.
Embargal esi sacho de pico,
y esas jocis clavás en el techo,
                     y esa segureja
                     y ese cacho e liendro...
¡Jerramientas, que no quedi ni una!
                     ¿Ya pá qué las quiero?
Si tuvía que ganalo pa ella,
¡cualisquiá me quitaba a mí eso!
Pero ya no quio vel esi sacho,
ni esas jocis clavás en el techo,
                     ni esa segureja
                     ni ese cacho e liendro...
¡Pero a vel, señol jues: cuidiaíto
                     si alguno de esos
es osao de tocali esa cama
ondi ella s’ha muerto:
la camita ondi yo la he querío
cuando ambos estábamos güenos;
la camita ondi yo la he cuidiau,
la camita ondi estuvo su cuerpo
                     cuatri mesis vivo
                     y una noche muerto...!
Señol jues: que nenguno sea osao
de tocali a esa cama ni un pelo,
                     porque aquí lo jinco
                     delanti usté mesmo.
                     Lleváisoslo todu,
                     todu menos eso,
                     que esas mantas tienen
                     suol de su cuerpo...
¡y me güelin, me güelin a ella
                      ca vez que las güelo...! 

José María Gabriel y Galán (1870-1905)